Beesha Caalamka oo baaq u dirtay Madaxda Soomaalida

Beesha Caalamka ayaa markale Madaxda Dowladda Federaalka iyo kuwa Dowladda Goboleedyada ugu baaqday inay heshiis ka gaaraan arrimaha doorashooyinka ee dalka.

Bayaan ka soo baxay saaxiibada caalamka ee Somaliya ayaa Dowladda Federaalka loogu baaqay inay dalka ka qabato doorasho heshiis iyo wada ogol ah.

Bayaanka ayaa u qornaa:-

Iyadoo ay Soomaalidu u diyaar garoobayaan soo dhaweynta Bisha Barakeysan ee Ramadaan, Beesha Caalamigu waxay muujinayaan rajo ah in mabaadi’da aasaasiga ah ee milicsiga, dulqaadka, Iscafinta iyo dib-u-heshiisiintu ay u horseedi doonaan guul shir madaxeed oo ay yeeshaan hoggaamiyeyaasha Dowladda Federaalka iyo Dowlad Goboleedyada xubnaha ka ah Federaalka.

Xuseyna muhiimadda uu leeyahay Shir-madaxeedka la qorsheeyay ee DFS-DXDF, Saaxiibada Caalamku waxay ku boorrinayaan in wada hadalakan ay hormuudka ka tahay Soomaalida isla markaana ay Soomaali leedahay uu horseed u noqon doonto xallinta dhammaan arrimaha taagan iyo in la oggolaado hirgelinta geeddi-socodka doorashooyinka ee 17 Sebtember. Heshiiska noocan oo kale ah, oo astaan u ah midnimada, u damqashada iyo daryeelika dadka kale, wuxuu muujinayaa hoggaan iyo danayn ummadda Soomaaliyeed isla markaana waxuu u noqon doonaa hadiyad bisha Ramadaan u gaar ah dadka Soomaaliyeed.

Waxaan ku boorineynaa madaxda DFS iyo DXDF inay fursaddan u adeegsadaan inay ku xalliyaan khilaafaadkooda oo ay sameeyaan waxyaabaha lagama maarmaanka u ah si loo hubiyo in doorashadu noqoto mid lagu kalsoonaan karo,waqtigeeda, iyo si nabad ah ku qabsoomi karta iyadoo aan dib-u-dhac dambe ku imaan si loogu oggolaado Soomaaliya inay horay u socoto.

Bayaanka waxaa ku saxiixnaa Hawlgalka Midowga Afrika ee Somaliya, Belgium, Canada, Shiinaha, Denmark, Jabuuti, Itoobiya, Midowga Yurub, Finland, Faransiiska, Jarmalka, Urur Goboleedka IGAD, Ireland, Talyaaniga, Japan, Ururka Jaamacadda Carabta, Holland, Norway, Ururka Iskaashiga Dalalka Islaamka (OIC), Ruushka, Qadar, Suudaan, Sweden, Switzerland, Turkey, Uganda, Boqortooyada Midowdey ee Britain, Dowladda Mareykanka iyo  Qaramada Midoobey.

Faallooyin