Kuuriyada waqooyi oo ku dhawaaqday in uu burburay wada xaajoodkii kala dhaxeeyay Mareykanka

Wadahadalada Niyuukleer-ka ee u dhaxeeyay saraakiil ka socota xukuumada Washington iyo Pyongyang, oo ka socday dalka Sweden ayaa burburay sida uu sheegay matalaha dhanka wadaxaajoodka Kuuriyada Waqooyi.

Shirka oo ka dhacay xarun ku taala duleedka magaalada caasimada ah ee Stockholm, ayaa ahaa kii ugu horeeyay oo si toos ah ay u kulmaan saraakiil sare oo ka tirsan labada Dhinac.

Madaxweyne Donald Trump iyo hogaamiyaha kuuriyada waqooyi Kim Jong Un, ayaa bishii June ee bartamihii sanadkaan isku waafaqay in dib loo bilaabo wadahadalada Niyuukler-ka oo horay hakad u Galay.
Bishii Febraayo ee sanadkaan ayaa labada madaxweyne waxay kulan ku qaateen dalka Vietnam, inkastoo ay kala tageen iyagoo aan gaarin wax Heshiis Ah.

Matalaha dhanka wadahadalada Kuuriyada waqooyi mr Kim Myong Gil oo warbaahinta kula hadlay afaafka hore ee safaarada dalkaasi ku leeyahay magaalada Stockholm ayaa sheegay in ay burbureen.

Mr Gil ayaa intaa raaciyay in Mareykanka uusan la imaan dulqaad badan si ay u sii socdaan wadahadalka labada Dhinac.

Dhanka kale xukuumada Washington ayaa sheegtay in aysan xaqiiqda ka tarjumeyn hadalka Kim Myong Gil, ayna Washington aqbashay casuumaada si loo sii wado wada xaajood dheeraad ah laba todobaad Kadib.

Faallooyin